जनकपुर, १२ माघ । धनुषा निर्वाचन क्षेत्र नम्बर ४ मा नेकपा एमालेका पूर्व जिल्ला कमिटी सदस्य तथा क्षिरेश्वरनाथ नगरपालिका–५ का स्थानीय तह निर्वाचनका निकटतम प्रतिद्वन्द्वी राजु गुप्ता नेपाली कांग्रेसमा प्रवेश गरेका छन् ।
जनकपुरमा आयोजित एक कार्यक्रममा नेपाली कांग्रेस धनुषाका प्रभावशाली नेता महेन्द्र यादव, जिल्ला सभापति योगेन्द्र पजियार तथा काग्रेसका सांसद कुमारकान्त झा लगायतका नेताहरूको उपस्थितिमा गुप्ताले औपचारिक रूपमा कांग्रेस प्रवेश गरेका हुन् ।
कार्यक्रममा कांग्रेस नेताहरूले गुप्तालाई पार्टीमा स्वागत गर्दै आगामी निर्वाचन तथा संगठन सुदृढीकरणमा सक्रिय भूमिका निर्वाह गर्न आग्रह गरे ।
कांग्रेस प्रवेशपछि बोल्दै गुप्ताले लोकतान्त्रिक मूल्य–मान्यताको संरक्षण, विकास र जनताको हकहितका लागि नेपाली कांग्रेस नै उपयुक्त पार्टी भएको निष्कर्षसहित आफू कांग्रेसमा आबद्ध भएको बताए ।
उनले स्थानीय तहदेखि संघीय तहसम्म कांग्रेसको संगठन मजबुत बनाउन सक्रिय रूपमा लाग्ने प्रतिबद्धता व्यक्त गरे ।
नेताहरूले गुप्ताको प्रवेशले धनुषा क्षेत्र ४ मा पार्टीको संगठन थप सुदृढ हुने विश्वास व्यक्त गर्दै यसले आगामी चुनावी राजनीतिमा सकारात्मक प्रभाव पार्ने बताएका छन् ।
