काठमाडौँ, ११ माघ । राष्ट्रिय स्वतन्त्र पार्टीका वरिष्ठ नेता बालेन शाहले वनजंगल छेउछाउमा बसोबास गरिरहेका गाउँहरूलाई योजनाबद्ध रूपमा स्थानान्तरण गर्नुपर्ने धारणा व्यक्त गरेका छन् ।
आइतवार कार्यकर्ताहरूसँगको छलफलका क्रममा उनले वन संरक्षण र मानवीय सुरक्षालाई एकसाथ सम्बोधन गर्ने सरकारी नीति आवश्यक रहेको बताए ।
बालेनका अनुसार जंगल नजिक मानव बस्ती राख्नु दीर्घकालीन रूपमा जोखिमपूर्ण छ । यसले वन्यजन्तु–मानव द्वन्द्व बढ्नुका साथै वन विनाश र मानवीय क्षतिको सम्भावना पनि बढाउने उनको भनाइ छ ।
त्यसैले सरकारको नीति जंगलको छेउमा रहेका बस्तीलाई सुरक्षित र व्यवस्थित स्थानमा स्थानान्तरण गर्ने खालको हुनुपर्ने उनले जोड दिए ।
उनले स्थानान्तरण गर्दा स्थानीयको हकहित सुनिश्चित गर्नुपर्नेमा जोड दिँदै भने, ‘जसको जति जग्गा छ, त्यही बराबरको जग्गा अन्य उपयुक्त स्थानमा उपलब्ध गराएर मात्र स्थानान्तरण गर्नुपर्छ।’ यसो गर्दा प्रभावित नागरिकलाई अन्याय नहुने र स्थानान्तरण प्रक्रियाप्रति विश्वास बढ्ने उनको धारणा छ ।
बालेनले मानिसलाई जंगलसँगै राख्नु उपयुक्त नहुने भन्दै दीर्घकालीन वातावरणीय सन्तुलन र जनसुरक्षाका लागि स्पष्ट र दीगो नीति आवश्यक रहेको उल्लेख गरे ।
