काठमाडौं, २१ पुस । नेकपा एमालेका सचिव महेश बस्नेत र अभियन्ता दुर्गा प्रसाईँले एक-अर्काविरुद्ध दायर गरेको गाली बेइज्जतीसम्बन्धी मुद्दामा अदालतले दुवै पक्षको दाबी पुग्ने फैसला गरेको छ ।
भक्तपुर जिल्ला अदालतका न्यायाधीश नवराज दाहालको इजलासले सोमबार बस्नेत र प्रसाईँले एक-अर्काविरुद्ध दायर गरेका मुद्दामा माग बमोजिमको दाबी पुग्ने ठहर गर्दै फैसला सुनाएको हो ।
अदालतले दुवै पक्षले प्रस्तुत गरेका प्रमाण, बयान र बहसका आधारमा मुद्दामा दाबी पुग्ने निष्कर्ष निकालेको जनाइएको छ । महेश बस्नेतले दुर्गा प्रसाईँविरुद्ध २०८० साल कात्तिक १७ गते गाली बेइज्जती मुद्दा दर्ता गराएका थिए भने दुर्गा प्रसाईँले त्यसअघि नै २०८० कात्तिक ११ गते बस्नेतविरुद्ध सोही प्रकृतिको मुद्दा दायर गरेका थिए ।
दुवैले एक-अर्काले सार्वजनिक रूपमा आफूहरूको मानहानी हुने गरी अभिव्यक्ति दिएको दाबी गर्दै अदालतमा मुद्दा लगेका हुन् । फैसलामा दुवै पक्षको दाबी पुग्ने भनिए पनि कस्तो प्रकारको सजाय हुने भन्ने विषयमा भने अझै स्पष्ट भइसकेको छैन ।
दुवै पक्षले कैद र जरिवानासहितको सजायको माग गर्दै अदालतमा दाबी पेश गरेका थिए । सजाय निर्धारणसम्बन्धी आदेश भने आगामी दिनमा सार्वजनिक हुने अदालत स्रोतले जनाएको छ ।
