वीरगञ्ज, २१ पुष । दुई समुदायबीचको प्रदर्शनलाई लक्षित गर्दै पर्साको वीरगञ्ज महानगरपालिकामा स्थानीय प्रशासनले निषेधाज्ञा जारी गरेको छ ।
सम्भावित झडप, तोडफोड र अप्रिय घटना हुन नदिन शान्ति–सुरक्षा कायम गर्ने उद्देश्यले प्रमुख जिल्ला अधिकारीको आदेशअनुसार निषेधाज्ञा लागू गरिएको हो।निषेधाज्ञासँगै वीरगञ्जका मुख्य क्षेत्रहरू पूर्ण रूपमा बन्द गरिएका छन् ।
बजार क्षेत्र, चोकहरू र संवेदनशील स्थानहरूमा सुरक्षाकर्मीको बाक्लो उपस्थिति रहेको छ भने पाँच जनाभन्दा बढी भेला हुन, जुलुस, प्रदर्शन, सभा तथा नाराबाजी गर्न रोक लगाइएको छ ।
अत्यावश्यक सेवाबाहेक अन्य सवारीसाधनको आवतजावतसमेत नियन्त्रण गरिएको प्रशासनले जनाएको छ । स्थानीय प्रशासनका अनुसार दुई समुदायबाट आ–आफ्ना माग राख्दै प्रदर्शनको तयारी भइरहेकाले अवस्था तनावग्रस्त बन्न सक्ने आकलन गरिएको थियो । त्यसैलाई ध्यानमा राख्दै समयमै निषेधाज्ञा जारी गरी स्थिति नियन्त्रणमा लिने प्रयास गरिएको हो ।
हालसम्म कुनै ठूलो अप्रिय घटना नभए पनि सतर्कताका लागि सुरक्षाकर्मीलाई उच्च तयारी अवस्थामा राखिएको छ । प्रशासनले सर्वसाधारणलाई अफवाहमा नपर्न, शान्ति र सद्भाव कायम गर्न तथा सुरक्षाकर्मीलाई सहयोग गर्न आग्रह गरेको छ ।
अवस्था सामान्य बनेपछि निषेधाज्ञा खुकुलो वा हटाइनेबारे निर्णय गरिने बताइएको छ ।
