जनकपुर, १० पुष । ऐतिहासिक मधेश आन्दोलनका प्रथम वीर सहिद रमेश महतोका दाजु रामसोभित महतोलाई मधेश प्रदेश सभाका नवनियुक्त सभामुख माननीय रामअशिष यादवले विशेष सम्मान गर्नुभएको छ ।
जनकपुरमा आयोजित एक औपचारिक समारोहका बीच उक्त सम्मान कार्यक्रम सम्पन्न भएको हो । कार्यक्रममा सभामुख यादवले मधेश आन्दोलनका क्रममा सहिद रमेश महतोले देखाएको साहस, समर्पण र बलिदानको उच्च प्रशंसा गर्दै उहाँको योगदानले मधेशको पहिचान, अधिकार र स्वाभिमानका लागि ऐतिहासिक मार्ग प्रशस्त गरेको बताउनुभयो ।
उहाँले सहिदहरूको त्यागका कारण आज मधेशका आवाजहरू सशक्त रूपमा स्थापित भएको उल्लेख गर्नुभयो । सभामुख यादवले सहिद परिवारप्रति राज्य सधैं ऋणी र कृतज्ञ रहने प्रतिबद्धता व्यक्त गर्दै सहिदहरूको सपना साकार पार्नु नै वर्तमान नेतृत्वको प्रमुख जिम्मेवारी भएको धारणा राख्नुभयो ।
उहाँले मधेश आन्दोलनका मूल्य र आदर्शलाई संस्थागत गर्न सबै जनप्रतिनिधि एकजुट भएर अघि बढ्नुपर्ने आवश्यकता औंल्याउनुभयो । सम्मान ग्रहण गर्दै रामसोभित महतोले सहिद रमेश महतोको बलिदानलाई स्मरण गर्दै मधेश आन्दोलन केवल अधिकारको लडाइँ मात्र नभई सम्मान र पहिचानको आन्दोलन भएको बताउनुभयो ।
उहाँले सहिदहरूको सपना पूरा गर्न मधेशका जनप्रतिनिधिहरू इमान्दार, जिम्मेवार र जनमुखी भएर काम गर्नुपर्नेमा जोड दिनुभयो । साथै, सहिदहरूको बलिदानलाई केवल समारोह र भाषणमा सीमित नराखी व्यवहार र नीतिगत निर्णयमा उतार्न आग्रह गर्नुभयो ।
