महोत्तरी, ८ पुस । महोत्तरीको गौशाला–१ रामनगरस्थित एभरेस्ट सुगर एन्ड केमिकल इन्डस्ट्रिजले सोमबारदेखि यस वर्षको उखु क्रसिङ सुरु गरेको छ ।
गत वर्षभन्दा करिब दुई साता ढिलो गरी क्रसिङ सुरु भए पनि उद्योगलाई उखु पर्याप्त पुगेको छैन । दैनिक ५५ हजार क्विन्टल उखु क्रसिङ गर्ने क्षमता भए पनि पहिलो दिन १५ हजार क्विन्टल मात्र उखु आएको उद्योगले जनाएको छ ।
चिसो मौसमका कारण किसानले उखु कटान गर्न नसक्दा आपूर्ति प्रभावित भएको हो । यस वर्ष उखुको मूल्य प्रतिक्विन्टल ६२० रुपैयाँ र सरकारले ७० रुपैयाँ अनुदान दिने व्यवस्था गरेको छ ।
