काठमाडौं, ७ पोष । एमसीए र नेपालले मिलेनियम च्यालेन्ज कर्पोरेसन (एमसीसी) कम्प्याक्टअन्तर्गत सडक मर्मत आयोजनाका लागि करिब २ करोड ३७ लाख अमेरिकी डलर (३ अर्ब ४३ करोड रुपैयाँ) बराबरका दुई ठेक्का सम्झौता गरेका छन् ।
सम्झौताअनुसार पूर्व–पश्चिम राजमार्गको धान खोला–लमही ४० किलोमिटर खण्डमा ‘फुल डेप्थ रिक्लेमेसन’ र ‘सुपरपेभ’ प्रविधिबाट सडक स्तरोन्नति गरिनेछ । सडक ७ मिटर क्यारिजवे र २.५ मिटर सोल्डरसहित १२ मिटर चौडा बनाइनेछ ।
यसैगरी, उक्त सडक खण्ड र नारायणघाट–मुग्लिन सडकको मर्मत कार्यको सुपरिवेक्षणका लागि इन्टरनेसनल कन्सल्ट्यान्ट्स एन्ड टेक्नोक्र्याट्स प्रालिसँग सम्झौता गरिएको छ ।
एमसीए र नेपालका अनुसार आयोजनाले सवारी सञ्चालन लागत घटाउने र सडक सुरक्षामा सुधार ल्याउने अपेक्षा गरिएको छ । अमेरिकी राजदूत र अर्थ मन्त्रालयका प्रतिनिधिले यसलाई दिगो र आधुनिक सडक मर्मततर्फको महत्वपूर्ण कदम बताएका छन् ।
