काठमाडौं, २२ कार्तिक । नेपाल उद्योग वाणिज्य महासंघद्वारा आयोजित ‘राष्ट्रिय आर्थिक बहस २.०’ कार्यक्रममा प्रधानमन्त्रीले देशको आर्थिक उत्थानका लागि डर होइन, हातेमालो र सहकार्यको भावना आवश्यक रहेको बताएका छन् ।
महासंघका अध्यक्ष चन्द्रप्रसाद ढकालको अध्यक्षतामा सम्पन्न कार्यक्रममा प्रधानमन्त्रीले निजी क्षेत्रलाई देशको आर्थिक समृद्धिको “जगका ढुङ्गा” का रूपमा सम्बोधन गर्दै सरकार उद्योगी–व्यवसायीका समस्या समाधानमा प्रतिबद्ध रहेको स्पष्ट गरे ।
उनले सुशासन, नीतिगत सुधार र सहकार्यलाई आर्थिक पुनरुत्थानको “इन्जिन” का रूपमा व्याख्या गर्दै भने, “नेपाल निर्माणका इन्जिनियर नेपाली स्वयं हुन्, सरकार र समाज इन्जिन हुन्, र उद्यमी–व्यवसायी तथा श्रमिक इन्धन हुन् ।
भर्खरै सम्पन्न जेनजी आन्दोलनको सन्दर्भमा प्रधानमन्त्रीले युवाको आवाजलाई सकारात्मक म्यान्डेटको रूपमा ग्रहण गर्दै भ्रष्टाचार, घुसखोरी र लुटतन्त्र सह्य नभएको जनमतलाई सरकारले सम्मान गर्ने बताए ।
उनका अनुसार सरकार निजी क्षेत्रसँग मिलेर लगानी प्रवद्र्धन, रोजगारी सिर्जना र उत्पादनमुखी अर्थतन्त्रतर्फ अग्रसर भएको छ । उनले थपे, “हाम्रो देश हामीले नबनाए कसैले आएर बनाइदिँदैन, हामी नै आत्मविश्वासका साथ अघि बढ्ने हो ।
प्रधानमन्त्रीले प्रतिनिधि सभा निर्वाचनको तयारीसँगै आर्थिक स्थिरता र स्वच्छ लोकतान्त्रिक अभ्यासका लागि निजी क्षेत्रको सहकार्य अपरिहार्य रहेको उल्लेख गरे ।
