काठमाडौं, २१ कात्तिक । निर्वाचन आयोगमा हालसम्म १२५ राजनीतिक दल दर्ता भइसकेका छन् भने १८ दल दर्ता प्रक्रियामा रहेका छन् ।
संघीयता सबलीकरण तथा राष्ट्रिय सरोकार समितिको बैठकमा आयोगका प्रवक्ता नारायणप्रसाद भट्टराईले दर्ता प्रक्रियाबारे जानकारी दिँदै आगामी निर्वाचनका तयारी तीव्र पारिएको बताए ।
उनका अनुसार, मंसिर १ देखि १० गतेसम्म निर्वाचन प्रयोजनका लागि दल दर्ता खुला गरिएको छ, र कार्तिक मसान्तसम्म दर्ता प्रमाणपत्र लिने दलहरूलाई निर्वाचनमा भाग लिन सकिने व्यवस्था गरिएको छ ।
बैठकमा राष्ट्रिय सभा सदस्यहरूले निर्वाचनको विकल्प नभएको बताउँदै सरकारलाई शान्ति–सुरक्षाको सुनिश्चितता र राजनीतिक संवादमा सक्रिय हुन सुझाव दिएका छन् ।
उनीहरूले आन्दोलनका कारण प्रभावित क्षेत्रहरूमा शान्तिपूर्ण वातावरण बनाउने सरकारको जिम्मेवारी पनि औँल्याए ।
