काठमाडौं, २० कार्तिक । उच्च अदालत बुटवलको इजलासले रास्वपा सभापति रवि लामिछाने र पूर्वडीआईजी छविराज जोशीसँग सम्बन्धित मुद्दाको मूल मिसिल झिकाउने आदेश गरेको छ ।
अदालतका सूचना अधिकारी रामबहादुर कुँवरका अनुसार न्यायाधीश वासुदेव आचार्य र ओमप्रकाश अर्यालको संयुक्त इजलासले जिल्ला अदालतबाट फाइलसहितका सम्पूर्ण कागजात झिकाउन आदेश दिएको हो ।
मुद्दासम्बन्धी कागजात अपुरो भएको भन्दै उच्च अदालतले थप मिसिल झिकाईपछि मात्रै अर्को पेशी तोकिने र सुनुवाइ अघि बढाइने उल्लेख गरेको छ ।
अदालतको आदेशअनुसार, आवश्यक मिसिल प्राप्त भएपछि मात्रै रास्वपा अध्यक्ष लामिछानेले बिगो बराबरको रकम तिरेर थुनामुक्त हुन पाउने वा नपाउनेबारे निर्णय हुने बताइएको छ ।
रविले यसअघि बिगो बुझाएर रिहाइको माग गर्दै अदालतमा निवेदन दिएका थिए। अदालतले उक्त निवेदनमाथि छलफल अघि बढाउनका लागि सम्पूर्ण विवरण प्राप्त गर्न निर्देशन दिएको हो ।
