काठमाडौं, १८ कार्तिक । उपेन्द्र यादव नेतृत्वको जनता समाजवादी पार्टी (जसपा), नेपालले आफ्नो झण्डामा रहेको रातो पृष्ठभूमिमा अंकित पाँच कुने तारा अरू कुनै दलले प्रयोग नगर्न आग्रह गरेको छ ।
पार्टी प्रवक्ता मनीष सुमनद्वारा जारी विज्ञप्तिमा पाँच कुने तारा आफ्नो पार्टीको पहिचान भएको र अन्य दलले त्यसलाई चुनाव चिन्ह वा अन्य चिन्हको रूपमा प्रयोग गर्नु कानून विपरीत हुने उल्लेख गरिएको छ ।
जसपाको झण्डामा गोल घेराभित्र पाँच कुने तारा र त्यस भित्र मुठ्ठी कसेको हात छ भने, यसको चुनाव चिन्ह “ढल्केको छाता” हो ।
यता, माओवादी केन्द्र, एकीकृत समाजवादी लगायतका ९ कम्युनिस्ट घटकबीच बन्न लागेको नयाँ नेपाली कम्युनिस्ट पार्टीले पाँच कुने तारा चुनाव चिह्नका रूपमा प्रयोग गर्ने निर्णय गरेको खबर सार्वजनिक भएको छ । 
