काठमाडौं, १२ कात्तिक । आगामी प्रतिनिधि सभा निर्वाचनको तयारीका क्रममा सरकारले पहिलो पटक राजनीतिक दल र जेनजी पुस्ताका प्रतिनिधिहरूसँग संयुक्त वार्ता गर्न लागेका छन् ।
प्रधानमन्त्री निवास बालुवाटारमा आज (बुधबार) अपराह्न ४ बजे त्रिपक्षीय बैठक तय गरिएको हो । सरकारको पहलमा आयोजना हुने उक्त बैठकमा निर्वाचनको वातावरण निर्माण, युवापुस्ताको सहभागिता र राजनीतिक सहकार्यका विषयमा छलफल हुने बताइएको छ ।
सञ्चार तथा सूचना प्रविधि मन्त्री जगदीश खरेलका अनुसार निर्वाचन सफल बनाउनका लागि सरकार विभिन्न पक्षहरूसँग चरणबद्ध संवादमा जुटिरहेको छ ।
सरकारले हालसम्मका छलफल र संवादमार्फत दीर्घ समयपछि पुनः औपचारिक राजनीतिक सहकार्यको वातावरण बन्ने आशा व्यक्त गरेको छ। आगामी निर्वाचनलाई निष्पक्ष, सहभागी र समावेशी बनाउन यो बैठकलाई महत्वपूर्ण रूपमा हेरिएको छ।
