जनकपुर, ५ कात्तिक । आज मिथिलाञ्चल क्षेत्रमा ‘गोधन कुट्ने’ पर्व पारम्परिक विधिबाट मनाइँदैछ ।
बिहानैदेखि विशेषगरी महिलाहरू गाउँका चोकचौतारा र टोलटोलमा भेला भएर गोधन कुट्ने अनुष्ठानमा सहभागी भइरहेका छन् । प्रत्येक गाउँबस्तीमा महिला दिदीबहिनीहरू ओखलमा गोबर र केराउ मिसाएर गोधन कुट्दैछन् ।
यो पर्वको तयारी अघिल्लो रातदेखि नै सुरु हुन्छ । मिथिलामा रहेका गाई–भैंसीको गोठमा गोबरबाट माता लक्ष्मी र भगवान विष्णुको प्रतीक स्वरूप ‘गोधन’ तयार गरिन्छ ।
राति गोठमा रहेका गाईवस्तुले त्यस गोधनमाथि हिँडेपछि बाँकी रहेको गोबरलाई केराउ मिसाएर आज बिहान गोधन कुट्ने परम्परा रहिआएको हो ।
यस अवसरमा दिदीबहिनीहरूबीच रमाइलो हाँसो–ठट्टा हुने गर्छ । केराउको दाना खाएर बलिया बन, र दान नगर्ने हो भने गरिब बनी बस । यो पर्वले मिथिला समाजको सांस्कृतिक एकता, धार्मिक आस्था र पारिवारिक स्नेहलाई अझ बलियो बनाउने विश्वास गरिन्छ ।
