जनकपुर, २० असोज । सिरहाको कल्याणपुर नगरपालिका–८, अरङमा पाँच दलित परिवारको घर तोडफोड तथा लुटपाट गरेको आरोपमा वडाध्यक्ष रामकिशोर यादव पक्राउ परेका छन् ।
पीडितहरूले १३ जनाविरुद्ध आपराधिक उपद्रव अन्तर्गत जाहेरी दिएका थिए । प्रहरीको उपस्थितिमा भएको घटनामा वडाध्यक्षसहित तीन जना पक्राउ परेका छन् भने अन्यको खोजी भइरहेको छ ।
तोडफोडमा संलग्न समूहले असोज १ गतेको विश्वकर्मा पूजामा भएको विवादको बदलाको रूपमा घटना घटाएको आरोप छ । शोभित, विन्दे, अशोक, राजकुमार र रासलाल पासवानको घरमा क्षति पुगेको हो।
प्रहरीको थप टोली पुगेसँगै आक्रमणकारी भागेका थिए । एसपी शर्माका अनुसार अनुसन्धानका आधारमा थप कारबाही हुनेछ ।
