काठमाडौं, १२ असोज । नेपाली क्रिकेटले शनिबार नयाँ इतिहास रचेको छ ।
वेस्ट इन्डिजविरुद्धको पहिलो टी–२० अन्तर्राष्ट्रिय खेलमा नेपाल १९ रनले विजयी हुँदै ऐतिहासिक नतिजा निकाल्न सफल भयो । टस हारेर पहिले ब्याटिङ गरेको नेपालले निर्धारित २० ओभरमा ८ विकेट गुमाएर १४८ रन जोड्यो । कप्तान रोहित पौडेलले ३५ बलमा ३८ रन बनाउँदै इनिङ्स सम्हाले भने कुशल मल्लले २१ बलमा ३० रनको योगदान दिए ।
गुल्शन झाले २२ रन र दीपेन्द्रसिंह ऐरीले १७ रन बनाए । शुरुवाती दुई विकेट १२ रनमै गुमाएपछि रोहित र मल्लबीचको ५८ रनको साझेदारीले नेपाललाई सन्तोषजनक स्कोरसम्म पु¥याएको थियो । जवाफी ब्याटिङमा वेस्ट इन्डिज २० ओभरमा ९ विकेट गुमाएर १२९ रनमै रोकियो ।
उनीहरूको लागि नविन विदायसीले सर्वाधिक २२ रन बनाए भने अमिर जाङ्गो र किएसी कार्टीले समान १९–१९ रन जोडे । नेपालका बलरहरूमध्ये कुशल भुर्तेल उत्कृष्ट रहे—४ ओभरमा १७ रन खर्चिँदै २ विकेट लिए । त्यस्तै रोहित पौडेल, करण केसी, दीपेन्द्रसिंह ऐरी र नन्दन यादवले एक–एक विकेट हात पारे । वेस्ट इन्डिजतर्फ बलिङमा जेसन होल्डरले चम्किँदै ४ ओभरमा २० रन मात्र दिँदै ४ विकेट लिएका थिए ।
डेब्यू खेल्दै गरेका नविन विदायसीले पनि ३ विकेट लिएका भए तापनि टोलीलाई जित दिलाउन सकेनन् । यसअघि नेपालले भारत, अफगानिस्तान, बंगलादेशजस्ता टेष्ट मान्यता प्राप्त राष्ट्रसँग केही प्रतियोगितामा मात्र खेल्ने अवसर पाएको थियो ।
तर पूर्ण सदस्य राष्ट्रलाई पराजित गर्ने मौका भने पाएको थिएन । आज वेस्ट इन्डिजविरुद्धको जितले नेपाललाई अन्तर्राष्ट्रिय क्रिकेटमा नयाँ अध्यायमा प्रवेश गराएको छ ।
