जनकपुर, ९ असोज । धनुषा जिल्लाका १८ वटै पालिकाका खाता रोक्का भएका छन् ।
नगरसभा वा गाउँसभा गर्न नसक्दा, बजेट ल्याउन नसक्दा र अघिल्लो वर्षको खर्चको हिसाब बुझाउन नसक्दा धनुषाका सबै स्थानीय निकायका खाता रोक्का भएका हुन् ।
धनुषा जिल्लाका कुनै पनि स्थानीय निकायले ती नियम पूरा गर्न सकेका छैनन् । पालिकाका खाता सञ्चालनमा नआउँदा सबैको आर्थिक कारोबार ठप्प भएको छ ।
जिल्लाका एक उपमहानगरपालिका, ११ नगरपालिका तथा ६ गाउँपालिकाको खाता सञ्चालनमा नआएको कोष तथा लेखा नियन्त्रकको कार्यालयले जनाएको छ ।
चालू आर्थिक वर्ष शुरु भएको दुई महिना बित्दा पनि स्थानीय तहको खाता नखुल्दा कर्मचारीले तलब पाएका छैनन् । यसैगरी विकास निर्माणको काम पनि ठप्प भएको छ ।
स्थानीय तहको खाता सञ्चालनका लागि नगरसभा वा गाउँसभा सम्पन्न गर्नुपर्ने, आर्थिक र विनियोजन विधेयक पारित गर्नुपर्ने, चालू वर्षको बजेट पारित गर्नुपर्ने र अघिल्लो वर्षको खर्चको हिसाब बुझाएर मात्र खाता मिलाउनैपर्छ ।
धनुषाका स्थानीय पालिकाले ती प्रक्रिया पूरा नगरेकाले खाता बन्द रहेको छ । कोष तथा लेखा नियन्त्रकको कार्यालयका अनुसार १८ पालिकामध्ये १० पालिकाले चालू आर्थिक वर्ष २०८२।८३ को बजेटसमेत बनाउन सकेका छैनन् ।
