काठमाडौँ, ९ असोज । माओवादी केन्द्रका अध्यक्ष पुष्पकमल दाहाल ‘प्रचण्ड’ले आफूलाई पदलोभी भनेर बाहिर फैलाइएका प्रचारप्रति असन्तोष व्यक्त गरेका छन् ।
राजधानीको प्रज्ञा भवनमा बिहीबार सुरु भएको केन्द्रीय समिति बैठकमा राजनीतिक प्रतिवेदन पेश गर्दै उनले अहिलेको राजनीतिक अवस्था जटिल, विकराल र गम्भीर रहेको बताए ।
प्रचण्डका अनुसार आन्दोलनलाई मजबुत बनाउन विशेष महाधिवेशनसम्म जाने आवश्यकता देखिएको छ । उनले भने, “नेतृत्व हस्तान्तरण प्रक्रियागत रूपमा हुनुपर्छ भन्ने मेरो धारणा हो । मलाई पदमै बसिराख्नुपर्छ भन्ने लाग्दैन । जबरजस्ती पदमा अडिने स्वभाव मेरो छैन।”
उनले संविधान दिवसका अवसरमा दिएको सन्देशमा समेत नेतृत्वको प्रक्रियागत हस्तान्तरण अपरिहार्य रहेको बताएका थिए । जेनजी आन्दोलनपछि शीर्ष नेताहरूबीच नेतृत्व हस्तान्तरणबारे गम्भीर प्रश्नहरू उठ्न थालेको उनको भनाइ छ ।
