सिरहा, ७ असोज । सिरहाको गोलबजार नगरपालिका १३, दुर्गापुर डङ्ग्राहमा १४ वर्षीय बालक अभिषेककुमार सिंहको अपहरणपछि हत्या भएको छ ।
घटनामा संलग्न भएको आशंकामा प्रहरीले आफन्त र छिमेकीसहित आठ जनालाई नियन्त्रणमा लिएको हो । बालकको शव आईतवार बिहान घरभन्दा करिब १०० मिटर पूर्व अर्जुन आधारभूत विद्यालय नजिकैको आँपको बगैँचामा फेला परेको प्रहरीले जनाएको थियो ।
अभिषेक असोज ५ गते राति खाना खाएर घरबाट निस्केका थिए । सुरुमा साथीहरूसँग झिँजिया हेर्न गएको ठानेर परिवारले तत्काल खोजतलास गरेनन् ।
तर, भोलिपल्ट बिहानसम्म पनि उनी घर नफर्किएपछि परिवारले खोज्न थालेका थिए । वडा अध्यक्ष नन्दकुमार महतोका अनुसार त्यसै क्रममा मोबाइलमा ५ करोड फिरौती माग्दै हिन्दी भाषामा एउटा म्यासेज आएको थियो ।
म्यासेजमा २५ सेप्टेम्बरभित्र रकम बुझाउन र प्रहरी तथा पत्रकारलाई खबर गरे जे पनि हुन सक्ने चेतावनी दिइएको थियो । परिवारले घटनाको जानकारी पाउनसाथ प्रहरीलाई खबर गरे पनि प्रहरीले खोजतलासलाई प्राथमिकता नदिएको उनीहरूको गुनासो गरे ।
प्रहरीले भने अहिले अनुसन्धान जारी रहेको र थप विवरण सार्वजनिक गर्न नमिल्ने बताएको छ । अभिषेकको शव पोस्टमार्टमका लागि बी.पी. कोइराला स्वास्थ्य विज्ञान प्रतिष्ठान, धरान पठाइएको जिल्ला प्रहरी कार्यालय, सिरहाका प्रमुख आनन्दराम शर्माले जानकारी दिए ।
