काठमाडौं, ७ असोज । शिक्षा, विज्ञान तथा प्रविधिमन्त्री महावीर पुन आजदेखि मन्त्रालयमै बस्ने भएका छन् ।
सोमबार शपथ लिएर पदभार ग्रहण गरेपछि मन्त्री पुनले मन्त्रालयमै आवासको व्यवस्था मिलाउन निर्देशन दिएका थिए । मन्त्रालयका अनुसार केशर महल परिसरमै उहाँलाई बस्ने कोठा उपलब्ध गराइएको छ ।
मन्त्रालयकी सहसचिव अनिता निरौलाले भनिन्, “कोठा भेटिएको छ । आज बेलुकादेखि मन्त्रीज्यू मन्त्रालयमै बस्नुहुनेछ । बस्ने र खाने आवश्यक सबै सुविधा मिलाइएको छ ।“
जेन–जी आन्दोलनका क्रममा सिंहदरबारभित्रको भवनमा आगजनी भएपछि शिक्षा मन्त्रालयले हाल केशर महलबाट सेवा प्रवाह गर्दै आएको छ ।
“सेवामा कुनै असर नपर्ने गरी कोठा तयारी गरिएको छ,“ निरौलाले थपिन्।
–––
