जनकपुर, ७ असोज । सिरहामा अपहरणमा परेका बालकको हत्या भएको छ ।
गोलबजार नगरपालिका–१३ भेल्हा डंगराहाका संजय सिंहका १५ वर्षीय छोरा अभिषेक सिंहको हत्या भएको अवस्थामा शव फेला परेको हो ।
मंगलवार बिहान बालकको शव आफ्नै घरभन्दा केही पर आँपको बगैंचामा उनको शव फेला परेको जिल्ला प्रहरी कार्यालय सिरहाका सूचना अधिकारी प्रहरी निरीक्षक धर्मेशकुमार यादवले जानकारी दिए ।
परिवारका अनुसार अभिषेक गत आइतबार राति ८ बजे बेपत्ता भएका थिए । परिवारले रातभरि खोजतलास गर्दा पनि फेला परेनन् । सोमबार बिहान करिब ८ बजे अभिषेकको मोबाइलबाट आमाको मोबाइलमा अपहरण भएको र फिरौती मागिएको म्यासज आएको थियो ।
यसबारे परिवारले प्रहरीमा खबर गरेका थिए । प्रहरीमा सोमबार नै खबर आएको सूचना अधिकारी यादवले जानकारी दिए ।
घटनाको थप अनुसन्धान थालिएको र डग टोली बोलाउने तयारी भएको प्रहरीले जनाएको छ ।
