काठमाडौँ, भदौ । नवनियुक्त कृषि तथा पशुपंक्षी विकासमन्त्री डा. मदन परियारले नेपालको कृषिमा दीर्घकालीनरूपमा देखिँदै आएको मल अभावको समस्या समाधान गर्न आफू गम्भीर रुपमा लाग्ने बताएका छन् ।
राष्ट्रपति भवन शीतल निवासमा सोमबार पद तथा गोपनीयताको शपथ लिएपछि पत्रकारहरूसँग कुराकानी गर्दै मन्त्री परियारले भने, “मलबिना कृषि उत्पादन सम्भव छैन, त्यसैले मल आपूर्तिको समस्या समाधान गर्न तत्काल पहल गरिनेछ ।
उनले मल आयातमा देखिएको अवरोधका कारण किसानहरू मारमा परेको स्वीकार्दै त्यसको जड अध्ययन गरेर नीति तथा कार्यान्वयनमा सुधार ल्याउने प्रतिबद्धता व्यक्त गरे ।
“मल आयात भएको भन्ने समाचार आउँछ, तर किसानले मल पाउँदैनन् । यो गम्भीर कुरा हो । यसको चाँडै अध्ययन गरेर आवश्यक निर्णय लिन्छु,” मन्त्री परियारले स्पष्ट पारे ।
