केपि रिपोर्टर, निभा झा ।
जनकपुर, २८ भदौं । धनुषा जिल्लाको क्षिरेश्वरनाथ नगरपालिका–५ स्थित दुधमति चौकको ऐतिहासिक तथा धार्मिक दुधमति घाटमा श्री श्री १०८ श्री जितमाहान मेला महोत्सव २०८२ सुरु भएको छ ।
हरेक वर्ष झैँ यस वर्ष पनि यो मेला भदौ २८ देखि ३० गतेसम्म आयोजना भएको छ । धार्मिक, सांस्कृतिक र सामाजिक रूपमा महत्वपूर्ण मानिने जितमाहान मेला स्थानीयवासी मात्र होइन, आसपासका जिल्लाहरू र भारतको सीमावर्ती क्षेत्रका श्रद्धालु तथा दर्शकहरूलाई समेत आकर्षित गर्दै आएको छ ।
सांस्कृतिक र धार्मिक कार्यक्रमहरू
तीन दिनसम्म चल्ने यो मेलामा विविध सांस्कृतिक कार्यक्रमहरू आयोजना गरिएको आयोजक समितिले जनाएको छ । स्थानीय कलाकारहरूसँगै बाह्य क्षेत्रका सांस्कृतिक टोलीहरूको पनि प्रस्तुति रहनेछ ।
यसले स्थानीय संस्कृति, भाषा र परम्पराको जगेर्नामा टेवा पुग्ने आयोजकहरूको विश्वास छ । मेलाको पहिलो दिन धार्मिक पूजापाठ, भजनकीर्तन, दीप प्रज्वलन र शोभायात्राजस्ता कार्यक्रमहरू सम्पन्न भएका छन् ।
दुधमति घाट : धार्मिक गतिविधिको केन्द्र
दुधमति घाट धार्मिक र सांस्कृतिक गतिविधिको प्रमुख केन्द्र मानिन्छ । यहाँ वर्षभरि विभिन्न समयमा विशेष महोत्सवहरू आयोजना हुने गरेका छन् ।
प्रमुख महोत्सवहरूमा
छठ पर्व
सामूहिक मुण्डन महोत्सव,
कावड यात्रा
र अन्य धार्मिक अनुष्ठानहरू सामेल छन् ।
यस्ता गतिविधिहरूले यो क्षेत्रलाई धार्मिक पर्यटनको गन्तव्यका रूपमा समेत विकास गर्न सक्ने सम्भावना रहेको स्थानीयहरू बताउँछन् ।
स्थानीय सहभागिता र व्यवस्थापन
मेलामा स्थानीय संघ–संस्था, युवाहरू, सुरक्षा निकाय तथा स्वयंसेवकहरूको सक्रिय सहभागिता रहेको छ । भीड व्यवस्थापन, सरसफाइ, ट्राफिक व्यवस्थापन, र खानेपानीको सुविधा सुनिश्चित गर्न आवश्यक तयारी गरिएको थियो । 
