काठमाडौं, २९ भदौ । भदौ २३ र २४ गते भएको जेनजी आन्दोलनपछि नेपालको राजनीतिक परिस्थितिमा ठूलो परिवर्तन आएको छ ।
आन्दोलनपछि सुशीला कार्कीको नेतृत्वमा अन्तरिम सरकार गठन भएको छ र फागुन २१ गते आमनिर्वाचनको मिति समेत घोषणा भइसकेको छ । यस घटनापछि छिमेकी मुलुक भारत र चीनले कस्तो प्रतिक्रिया जनाए भन्ने चासो सबैमा छ ।
भारतले प्रधानमन्त्री कार्कीलाई सबैभन्दा पहिले बधाई दियो । भदौ २७ गते राति भारतको विदेश मन्त्रालयले विज्ञप्ति जारी गर्दै कार्कीलाई शुभकामना व्यक्त गर्यो । त्यसको भोलिपल्ट प्रधानमन्त्री नरेन्द्र मोदीले नेपाली, हिन्दी र अंग्रेजी तीनै भाषामा ट्वीट गर्दै बधाई दिए ।
मणिपुरमा आयोजित एक सार्वजनिक कार्यक्रममा उनले नेपालको राजनीतिक परिवर्तनको प्रशंसा गर्दै सुशीला कार्कीलाई प्रधानमन्त्रीको जिम्मेवारी सम्हालेकोमा शुभकामना दिएका थिए । सो भिडियो नेपालस्थित भारतीय दूतावासले सार्वजनिक गरेको थियो, जसले भारतले नेपालप्रति देखाएको विशेष चासो स्पष्ट हुन्छ ।
चीनको प्रतिक्रिया भने केही ढिलो आयो । प्रधानमन्त्री कार्कीलाई चीनले आइतबार मात्र बधाई सन्देश पठायो । चिनियाँ विदेश मन्त्रालयका प्रवक्ताले पठाएको सन्देश नेपालस्थित चिनियाँ दूतावासले सार्वजनिक गरेको हो ।
कार्कीको सपथग्रहण समारोहमा चीनका राजदूत चेन सोङ सहभागी थिए र उनीसँग प्रत्यक्ष भेट गरेर पनि बधाई दिएका थिए । तर हालसम्म चीनको शीर्ष राजनीतिक नेतृत्वबाट बधाई सन्देश आएको छैन ।
आन्दोलनकै बीचमा भदौ २५ गते चीनले प्रेस विज्ञप्ति जारी गर्दै नेपालको आन्तरिक समस्या छिटो समाधान होस् र स्थायित्व कायम होस् भन्ने आशा व्यक्त गरेको थियो । चीन–नेपाल मामिला विश्लेषक विपिन आचार्यका अनुसार चीन नेपालमा शान्ति र स्थिरता चाहन्छ ।
तर हालै दलाई लामाबाट आएको शुभकामना सन्देशलाई चीनले संवेदनशीलताका साथ लिएको हुनसक्ने उनको अनुमान छ ।
विशेषज्ञहरुका भनाइमा नेपाल अहिले संक्रमणको चरणमा छ र भारत तथा चीन दुवैसँग समान दूरीको सम्बन्ध राख्नु नै दीर्घकालीन हितमा हुनेछ ।
