जनकपुर, २९ भदौं । जनमत पार्टीले मधेस प्रदेशका मुख्यमन्त्री र मन्त्रीहरुलाई फिर्ता बोलाएको छ ।
जनमत पार्टीले मधेस प्रदेश सरकारको नेतृत्व गरिरहेका मुख्यमन्त्रीसहित मन्त्रीहरूलाई फिर्ता बोलाएको हो । संसदीय दलका नेता महेशप्रसाद यादवले विज्ञप्ति जारी गर्दै मुख्यमन्त्रीसहित मन्त्रीहरूलाई सरकारबाट फिर्ता बोलाएका हुन् ।
उक्त पार्टीबाट मुख्यमन्त्री सतिशकुमार सिंह, वन तथा वातावरणमन्त्री सञ्जय यादव र उद्योग वाणिज्य तथा पर्यटनमन्त्रीमा बसन्त कुशवाहा रहेका छन् ।
संसदीय दलका नेता यादवले सरकारबाट बाहिरिएको सम्बन्धी पत्र प्रदेश प्रमुखको कार्यालयमा पठाइएको जानकारी दिए । यही भदौ २३ र २४ गते ‘जेनजी’ आन्दोलनका क्रममा मुख्यमन्त्री सिंहले फेसबुकमा स्टाटस लेख्दै राजीनामा दिएका थिए ।
तर, उनले प्रदेश प्रमुखको कार्यालयमा लिखित राजीनामा भने दिएका थिएनन् । पछि उनले फेरि राजीनामा नदिएको अभिव्यक्ति दिएपछि उनको व्यापक आलोचना भएको थियो ।
त्यसपछि पार्टी संसदीय दलले मुख्यमन्त्रीसहितलाई सरकारबाट फिर्ता बोलाएको हो । मधेसमा जनमत पार्टी नेतृत्वको सरकारमा नेकपा (एमाले), नेपाली कांग्रेस र लोकतान्त्रिक समाजवादी पार्टी (लोसपा)ले सरकार चलाउँदै आएका छन् ।
