जनकपुर, २६ भदौ । जलेश्वर कारागारबाट मंगलबार साँझ भागेका कैदीबन्दीमध्ये केही स्वेच्छिक रूपमा फर्किन थालेका छन् ।
कारागारका सूचना अधिकारी रविन्द्र ठाकुरका अनुसार कुल ५७६ मध्ये एक बाहेक सबै भागेको थियो । बुधबार दिउँसो सवा १ बजेसम्म १९ जना स्वेच्छिक रूपमा कारागार फर्किएका छन् ।
कारागार प्रशासनले बुधबार साँझ २४ घण्टे अल्टिमेटम जारी गर्दै स्वेच्छिक रूपमा फर्किन आग्रह गरेको थियो । अल्टिमेटमपछि फर्किनेको संख्या बढ्न थालेको ठाकुरले जनाए ।
‘फर्किने क्रम जारी छ, बाँकीलाई समेत पक्राउ गरेर ल्याइनेछ,’ ठाकुरले भने ।
कारागारबाट जघन्यदेखि सामान्य अपराधका कैदी भागेका थिए । धेरै भारततर्फ लुकेको आशंका गरिएको छ ।
जेनजी आन्दोलनको क्रममा नख्खु कारागारका कैदी निस्किएको उदाहरणलाई देखाउँदै आन्दोलनकारीले जलेश्वर कारागारमा थुनामा रहेका मधेश आन्दोलन–२०७२ का एक घटनाका ६ कैदीलाई छाड्न माग गरेका थिए ।
त्यसपछि कैदीहरुले भित्रैबाट आन्दोलन गरेका थिए । सुरक्षाकर्मीले नियन्त्रणमा लिन नसकेपछि एक बाहेक सबै कैदी भागेका थिए ।
