काठमाडौं, २० भदौ । राष्ट्रिय स्वतन्त्र पार्टी (रास्वपा) ले नेपालमा दर्ता प्रक्रियासम्बन्धी स्पष्टता माग्दै मेटा र युट्युबलाई पत्राचार गरेका छन् ।
बिहीबार सरकारले दर्ता नभएका भन्दै २६ वटा सामाजिक सञ्जाल बन्द गर्ने निर्णय गरेपछि रास्वपाले प्रयोगकर्तामध्ये सर्वाधिक लोकप्रिय रहेका मेटा र युट्युबसँग दर्ता प्रक्रियाबारे औपचारिक जानकारी लिएको हो ।
रास्वपाका सहमहामन्त्री विपीनकुमार आचार्यद्वारा पठाइएको पत्रमा सामाजिक सञ्जाललाई केवल मनोरञ्जनको साधन मात्र नभई शिक्षा, व्यवसाय, डिजिटल उद्यमशीलता र विश्वभरका नेपाली समुदायसँग जोड्ने महत्वपूर्ण माध्यमको रूपमा व्याख्या गरिएको छ ।
पत्रमा सामाजिक सञ्जालबाट आम नागरिकले आम्दानी गर्ने अवसर पाएको र दैनिक जीवनमा यसको ठूलो प्रभाव रहेको उल्लेख गरिएको छ। साथै, नेपालमा दर्ता प्रक्रियामा कुनै प्राविधिक वा कानुनी अवरोध भए प्रष्ट पारिदिन अनुरोध गरिएको छ ।
