काठमाडौं, १९ भदौ । नेपाली कांग्रेसका महामन्त्री गगन थापाले दर्ता नभएका सामाजिक सञ्जाल बन्द गर्ने सरकारले लिएको निर्णयलाई प्रतिगामी कदमको संज्ञा दिएका छन् ।
उनले बिहीबार सार्वजनिक गरिएको निर्णय तत्काल सच्याउनुपर्ने बताउँदै, अभिव्यक्ति स्वतन्त्रता र नागरिक अधिकारमाथि प्रहार हुने चेतावनी दिएका छन् । थापाले सामाजिक सञ्जालमार्फत आफ्नो धारणा राख्दै भने, “सरकार अगाडि बढ्नुपर्ने बेला उल्टो बाटोमा लागेको छ, यसलाई पुनर्विचार गरिनुपर्छ ।”
सर्वोच्च अदालतले सामाजिक सञ्जालमा देखापर्ने दुरुपयोग नियन्त्रणका लागि कानुनी व्यवस्था बनाउन सुझाव दिएको भए पनि, त्यसलाई आधार बनाएर पूर्णरूपमा बन्द गर्ने सरकारको निर्णय असंवैधानिक र अव्यावहारिक भएको उनको टिप्पणी छ ।
उनका अनुसार सामाजिक सञ्जाल आजको युगमा विचार आदान–प्रदान, सरकारलाई जवाफदेही बनाउन, उद्यमशीलता प्रवद्र्धन गर्न र डिजिटल अर्थतन्त्रलाई बलियो बनाउन महत्वपूर्ण उपकरण बनेको छ ।
यस्तो अवस्थामा गरिएको प्रतिबन्धले नागरिकको अभिव्यक्ति स्वतन्त्रता मात्र होइन, सूचनामा पहुँच पाउने अधिकारलाई समेत कुण्ठित गर्ने उनले बताए ।
