काठमाडौं, १९ भदौ । नेपाल दूरसञ्चार प्राधिकरणले देशभित्र सञ्चालनमा रहेका तर नेपालमा आधिकारिक सूचीकरण नगरेका २६ सामाजिक सञ्जालहरूलाई बन्द गर्न इन्टरनेट सेवा प्रदायकहरूलाई निर्देशन दिएका छन् ।
प्राधिकरणले बिहीबार सार्वजनिक गरेको विज्ञप्तिमा सबै प्रदायकहरूलाई उक्त प्लेटफर्महरू तत्काल निष्क्रिय गराउन भनिएको छ ।
विज्ञप्तिमा भनिएको छ, “सञ्चार तथा सूचना प्रविधि मन्त्रालयको २०८२ भदौ १९ गतेको मन्त्रीस्तरीय निर्णय र सामाजिक सञ्जाल प्रयोग व्यवस्थापन निर्देशिका, २०८० बमोजिम नेपालमा सूचीकरण नगरेका सामाजिक सञ्जालहरूलाई नेपालमा निष्क्रिय गराउन अनुरोध गरिएको छ ।”
यसअघि पनि प्राधिकरणले नेपालमा दर्ता नभएका अनलाइन प्लेटफर्महरूलाई कानुनी प्रक्रिया पूरा गर्न वा सेवा अवरुद्ध हुने चेतावनी दिँदै आएको थियो ।
