काठमाडौं, १६ भदौ । विद्यालय शिक्षा विधेयकको प्रावधानविरुद्ध निजी विद्यालय सञ्चालकहरूले सोमबार राजधानीको चक्रपथमा बस ¥याली गरेका छन् ।
प्याब्सन, नेशनल प्याब्सन, हिसान, अपेन र एनएमएका आवाहनमा विभिन्न निजी विद्यालयका बसहरू कालो झण्डा र ब्यानरसहित ¥यालीमा सहभागी भएका हुन् । बसहरूलाई चक्रपथका विभिन्न चोकमा जम्मा भई घेरा जस्तै बनाएर विरोध प्रदर्शन गर्न भनिएको थियो ।
निजी विद्यालय सञ्चालकहरूले विधेयकमा समावेश गरिएको कम्पनी ऐनअनुसार दर्ता भएका विद्यालयलाई गैरनाफामूलक बनाउनुपर्ने व्यवस्था हटाउन माग गरेका छन् ।
त्यस्तै, छात्रवृत्ति अनिवार्य व्यवस्था र छात्रवृत्तिसँगै पोशाक, पुस्तक, यातायात, खाना–खाजाजस्ता सुविधा दिनुपर्ने प्रावधानलाई पनि अस्वीकार्य बताउँदै खारेजीको माग गरिएको छ ।
प्रतिनिधिसभाको शिक्षा, स्वास्थ्य तथा प्रविधि समितिबाट विधेयक पारित भइसकेको छ भने अब यसलाई सभाबाट पारित गर्ने प्रक्रिया अघि बढाइएको छ ।
यता, निजी विद्यालय सञ्चालकहरूले आफ्ना माग भदौ १८ भित्र पूरा नभए अनिश्चितकालीन तालाबन्दी गर्ने चेतावनीसमेत दिएका छन् ।
