काठमाडौं, १५ भदौ । काठमाडौंमा दूध उत्पादक किसानले गरेको प्रदर्शनलाई प्रहरीले अवरोध गरेका छन् ।
लैनचौरस्थित दुग्ध विकास संस्थान (डिडिसी) कार्यालय अगाडि किसानहरूले विरोध प्रदर्शन थालेपछि प्रहरी हस्तक्षेपमा उत्रिएको हो ।
प्रहरीको अवरोधपछि केही समय किसान र सुरक्षाकर्मीबीच धक्का–मुक्का र तनाबपूर्ण अवस्था बनेको थियो ।
दुग्धको मूल्यसम्बन्धी भुक्तानीबारे पटक–पटक ध्यानाकर्षण गराए पनि सम्बोधन नभएको भन्दै अखिल नेपाल किसान महासंघको नेतृत्वमा किसानहरू धर्ना दिन डिडिसी कार्यालय अगाडि पुगेका थिए ।
काभ्रे, नुवाकोट, धादिङसहित काठमाडौं उपत्यका र वरपरका जिल्लाबाट आएका किसानहरूले प्रदर्शनमा सहभागिता जनाएको थियो ।
