काठमाडौं, ११ भदौ । पर्सामा फैलिएको हैजा संक्रमण बारासम्म पुगेको छ । जिल्ला स्वास्थ्य कार्यालय बाराका प्रमुख रामनरेश यादवका अनुसार कलैया अस्पतालमा उपचाररत एक बिरामीमा बुधबार हैजा संक्रमण पुष्टि भएको हो ।
संक्रमित व्यक्ति कलैया नगरपालिका–१८ पचौराका करिब ५५ वर्षीय पुरुष हुन् । उनी लामो समयदेखि पर्साको वीरगञ्जमा काम गर्दै आएका थिए । आइतबार अचानक झाडापखाला देखा परेपछि अस्पताल भर्ना भएका उनलाई परीक्षणपछि हैजा भएको पाइएको हो ।
स्वास्थ्य कार्यालयका अनुसार संक्रमितको घर–परिवार र छिमेकी क्षेत्रमा स्वास्थ्यकर्मी खटाइएर निगरानी सुरु गरिएको छ । साथै गाउँमा हैजा र झाडापखालसम्बन्धी जनचेतना कार्यक्रमसमेत चलाइएको छ ।
यादवका अनुसार हैजाको प्रकोप देखिएको वीरगञ्जसँग सीमा जोडिएका बाराका विश्रामपुर, पर्सौनी, परवानीपुर र फेटा गाउँपालिकामा निगरानी थप कडाइ गरिएको छ । एक जनामा संक्रमण पुष्टि भएको भन्दै डराउनुपर्ने अवस्था भने नरहेको उनको भनाइ छ ।
यसअघि वीरगञ्जमा फैलिएको हैजा पर्साको पोखरिया नगरपालिकासम्म पुगेको थियो । पोखरिया अस्पतालमा उपचाररत पाँच जनामध्ये तीन जनामा मंगलबार संक्रमण पुष्टि भएको थियो ।
