जनकपुर, १३ साउन। वर्षौंदेखि जर्जर अवस्थामा सञ्चालनमा रहेको क्षिरेश्वरनाथ नगरपालिकाको कार्यालय अब अत्याधुनिक सुविधासहितको नयाँ भवनमा सर्न लागिएको छ।
स्थानान्तरणको तयारी अन्तिम चरणमा पुगेको नगरपालिकाले जनाएको छ। भोली, श्रावण १४ गतेदेखि नगरपालिका कार्यालय औपचारिक रूपमा नयाँ भवनबाट सेवा दिन सुरु गर्ने तयारी गरिएको छ।
नगर प्रमुख सुखदेव यादवका अनुसार नयाँ भवनमा स्थानान्तरणसँगै सेवा प्रवाहमा सहजता, पारदर्शिता र गुणस्तरता आउने विश्वास गरिएको छ।
“यो केवल भौतिक संरचना निर्माणको कुरा होइन, नयाँ भवनमार्फत नागरिकप्रतिको हाम्रो उत्तरदायित्व अझ प्रभावकारी बनाउने लक्ष्य लिएको छौँ,” उनले बताए।
विशेष कार्यक्रमसहित उद्घाटन
स्थानान्तरणको अवसरमा नगरपालिकाले विशेष उद्घाटन समारोहको आयोजना गर्ने तयारी गरेको छ। कार्यक्रममा धार्मिक पूजापाठ, नगरभित्रका जेष्ठ नागरिकलाई सम्मान तथा भोजन, र सांस्कृतिक प्रस्तुतिहरू पनि समावेश गरिने जनाइएको छ।
स्थानीय संस्कृति र समुदायको सहभागिता सुनिश्चित गर्ने उद्देश्यले विविध कार्यक्रमहरू समेटिएको नगरपालिकाले जानकारी दिएको छ।
सुविधासम्पन्न र आकर्षक संरचना
नयाँ भवनमा मिथिला पेन्टिङले सजिएको भित्तो, बाँसबाट निर्माण गरिएको गोलघर, वाटर फाउन्टेन, पार्किङ क्षेत्र, तथा अन्य सुविधाहरू समावेश गरिएको छ, जसले सम्पूर्ण परिसरलाई पर्यावरणमैत्री र सौन्दर्ययुक्त बनाएको छ। यसले कार्यालय सञ्चालन मात्र नभई नगरको सांस्कृतिक र स्थापत्य पहिचानलाई पनि उजागर गर्ने अपेक्षा गरिएको छ।
