जनकपुर, २८ असार । धनुषा जिल्लाको लोकप्रिय सामाजिक संस्था तत्मा बौद्धिक समाज, धनुषाद्वारा यस वर्ष एसईई (SEE) परीक्षामा सफलता हासिल गरेका विद्यार्थीहरूलाई एक विशेष कार्यक्रमको आयोजना गरी सम्मान गरिएको छ।
सम्मानित विद्यार्थीहरूमा काजल दास र आनन्द दास रहेका छन्, जसले एसईई परीक्षामा उल्लेखनीय सफलता प्राप्त गरेका थिए। विद्यार्थीहरूको मेहनत र सफलतालाई उच्च मूल्याङ्कन गर्दै समाजले उनीहरूलाई प्रमाणपत्र प्रदान गरी सम्मानित गर्यो।
कार्यक्रमका प्रमुख अतिथि तथा समाजका अध्यक्ष इञ्जिनियर रामबाबु दासले सम्मान प्रदान गर्दै विद्यार्थीहरूलाई आगामी अध्ययनका लागि शुभकामना दिए।
उनले आगामी पुस्ताको लागि शिक्षा नै सबभन्दा महत्वपूर्ण हतियार भएको उल्लेख गर्दै सबै अभिभावकलाई बालबालिकाको शिक्षामा ध्यान दिन आग्रह गरे।
कार्यक्रममा समाजसेवी तथा नेता देव सागर दास, शिक्षकहरू दिलीप दास, दिनेश दास, र सन्तोष दास, साथै समाजका सचिव बिनोद दासले स्वागत मन्तव्य राख्दै विद्यार्थीहरूको प्रगति समाजको गौरव भएको बताए।
कार्यक्रममा समाजका उपाध्यक्ष उपेन्द्र दास ‘शशि’, अन्य पदाधिकारी तथा अभिभावकहरूको उपस्थिति रहेको थियो। उनीहरूले पनि छात्रछात्राको भविष्य उज्यालो बनोस् भन्ने शुभेच्छा व्यक्त गरे।
