महोत्तरी, ३१ जेठ । महोत्तरी जिल्लाको एकडारा गाउँपालिका–५, बहेरा गाउँमा लामो समयदेखि भोगचलन गर्दै आएको जग्गालाई लिएर विवाद चुलिएको छ ।
स्वर्गीय हसन अन्सारीले वर्षौंदेखि प्रयोग गर्दै आएको १४ धुर जग्गा हाल मन्नु मण्डलको नाममा नामसारी भएपछि अन्सारी परिवारले अन्यायको आरोप लगाउँदै विरोध जनाएका छन् ।
स्व. हसन अन्सारीका नाती गुलाम मस्ताफाका अनुसार उक्त जग्गामा उनका हजुरबुवा, बुवा र अहिले उनी स्वयं खेतीपाती गर्दै आइरहेका थिए ।
“हामीले पुस्तौँदेखि यो जग्गा भोगचलन गर्दै आएका हौं, तर केही महिना अघि मन्नु मण्डलले यो जग्गा आफ्नो नाममा रहेको भन्दै दाबी गर्न थालेपछि हामी स्तब्ध भयौं,“ मस्ताफाले बताए ।
यस घटनामा राजनीतिक हस्तक्षेपको आशंका गरिएको छ । स्थानिय नेताहरुले समेत अन्सारी परिवारको पक्षमा समर्थन जनाएका छन् । प्रदेशसभा सदस्य पदका पूर्व उम्मेदवार हरिनारायण मण्डलले भने, “यो जग्गा हसन अन्सारीकै हो भन्ने कुरामा कुनै दुईमत छैन ।”
स्थानिय समाजका बुद्धिजीवी तथा सामाजिक अगुवाहरूले समेत जग्गा अन्सारी परिवारकै भएको प्रमाणित गर्दै यथाशीघ्र न्यायको माग गरेका छन् ।
यस बिषयमा स्पष्ट जानकारी लिन वडाध्यक्ष सिराजउद्दिन अन्सारीलाई सम्पर्क गर्ने प्रयास गरिए पनि उनी सम्पर्कमा आउन सकेनन् । प्रभावित पक्षले न्यायको लागि गाउँपालिका तथा जिल्ला प्रशासन कार्यालयमा उजुरी समेत दिएका छन ।
स्थानीय बासिन्दाले यस विषयमा निष्पक्ष छानबिन गर्दै वास्तविक हकदारलाई जग्गा फिर्ता गरिनु पर्ने माग गरेका छन् ।
