जनकपुर, २३ जेठ । नेपाली कांग्रेसका सभापति तथा पूर्वप्रधानमन्त्री शेर बहादुर देउवाले जनकपुरमा निर्माण गरिएको भव्य मैथिली भवनलाई केवल भौतिक संरचनामा सीमित नराखी, यसलाई मैथिली भाषा, साहित्य, कला र संस्कृतिको संरक्षण तथा प्रवद्र्धनको केन्द्रका रूपमा विकास गर्न आग्रह गरेका छन् ।
मधेश सरकारको भौतिक पूर्वाधार विकास मन्त्रालयको करोडौं रुपैयाँको लगानीमा निर्मित उक्त भवनको शुक्रबार एक विशेष समारोहबीच उद्घाटन गर्दै सभापति देउवाले भने, “राम्रा भवनहरू बनाउनु राम्रो हो, तर यो भवनले ज्ञान, सीप, भाषा, साहित्य र सांस्कृतिक चेतनाको प्रवाह पनि गर्नुपर्छ ।
उनले मैथिली भाषा संविधानमा समावेश राष्ट्रिय भाषामध्ये एक भएको उल्लेख गर्दै यसका संरक्षण, विकास र प्रसारमा कोष जस्ता संस्थाहरूको भूमिका अझ सशक्त र सक्रिय हुनुपर्नेमा जोड दिए ।
सभापति देउवाले प्रदेशको नामाङ्कन सन्दर्भमा आफू “जनक र जानकी प्रदेश“ भन्ने नामको पक्षमा रहेको स्पष्ट गर्दै भने, “राजर्षि जनक केवल सामान्य राजा थिएनन् ।
उनका आदर्शहरू आज पनि देशका बिभिन्न ठाँउमा फैलिएका छन् ।“ उनले जनकपुरलाई राम–जानकी विवाहस्थल र सांस्कृतिक धरोहरका रूपमा प्रशंसा गर्दै यसको ऐतिहासिक, धार्मिक र सांस्कृतिक महत्व अझ विस्तार गर्न सकिने बताए ।
मैथिली विकास कोषद्वारा आयोजना गरिएको उक्त कार्यक्रममा कोषका अध्यक्ष जिवनाथ चौधरी, नेपाली कांग्रेस, नेकपा एमाले लगायत विभिन्न राजनीतिक दलका नेताहरूको उल्लेखनीय उपस्थिति रहेको थियो ।
परम्परागत मैथिली पोशाक, खानपान र स्वागत संस्कारले कार्यक्रमलाई विशिष्ट बनाएको थियो ।
