काठमाडौं, १९ जेठ । प्रधानमन्त्री केपी शर्मा ओली, कांग्रेस सभापति शेरबहादुर देउवा, पुष्पकमल दाहाल ’प्रचण्ड’सहितको बैठकमा राजावादीहरूको प्रदर्शनबारे छलफल भएको छ ।
छलफलमा ओली र देउवाले प्रतिगामीहरू सक्रिय भएको भन्दै प्रतिनिधिसभाको बैठक सञ्चालनमा अवरोध नगर्न प्रचण्डसहितका नेतालाई आग्रह गरेका थिए ।
दुवै शीर्ष नेताले सदन सञ्चालनका लागि अनुरोध गरेको छलफलमा सहभागी नेता महिन्द्रराय यादवले बताए । ’देउवा र ओलीले देशको परिस्थिति बिग्रिएको र प्रतिगामी सक्रिय भएको भन्दै सदन सञ्चालनमा अवरोध नगर्न ओली–देउवाले आग्रह गरेका थिए ।
जवाफमा प्रचण्डसहितका विषक्षी नेताले भने भोलि बिहान विपक्षी दलहरूको बैठक रहेको र उक्त बैठकबाट मात्रै सदन चल्न दिने या नदिनेबारे निर्णय हुने जानकारी गराएको उनले बताए ।
प्रधानमन्त्री तथा मन्त्रिपरिषद्को कार्यालय, सिंहदरबारमा भएको छलफलमा प्रधानमन्त्री ओली, नेपाली कांग्रेसका सभापति एवं पूर्वप्रधानमन्त्री देउवा, नेकपा (माओवादी केन्द्र) का अध्यक्ष एवं पूर्वप्रधानमन्त्री प्रचण्ड, गृहमन्त्री रमेश लेखक, नेपाली कांग्रेसका उपसभापति पूर्णबहादुर खड्का, कृष्णप्रसाद सिटौला, महेन्द्रराय यादव, देव गुरुङ, हितराज पाण्डे पनि उपस्थित थिए ।
