उदयपुर, २३ वैशाख । उदयपुरको कटारीमा चट्याङ लागेर एक बालकको मृत्यु भएको छ ।
कटारी नगरपालिकामा– ८ फूलबारीका १३ वर्षीय चित्रबहादुर वलम्पाकी मगरको चट्याङ लागेर मृत्यु भएको वडाध्यक्ष नवीन तामाङले जानकारी दिए ।
सोमबार दिउँसो बाख्रा चराउन गएका चित्र साँझसम्म पनि घर नफर्किएपछि आफन्तले खोजी सुरु गरेका थिए । खोजी गर्दै जाँदा सोमबार साँझ उनी जंगलमा ढलिरहेको अवस्थामा फेला परेका वडाध्यक्ष तामाङले बताए ।
साँझ बाख्रा आए पनि छोरा नआएपछि बुबा मानबहादुर खोज्न गएका रहेछन्’, वडाध्यक्ष तामाङले भने, ‘खोज्दै जाँदा वनमै चट्याङ लागेर ढलेको अवस्थामा भेटिएछन् ।
इलाका प्रहरी कार्यालय कटारीका प्रमुख प्रहरी नायब उपरीक्षक कमल बजगाईँले घटनाका सम्बन्धमा थप अनुसन्धान हुने बताए । बालकको घटनास्थलमै मृत्यु भएको बताइएको छ ।
