बारा, २० वैशाख । बारा प्रहरीले लागूऔषध गाँजा २२५ केजी सहित चार जनालाई पक्राउ गरेको छ ।
इलाका प्रहरी कार्यालय बारागढीबाट प्रहरी निरीक्षक कुसुम नायकको नेतृत्वमा खटिएको टोलीले आदर्श कोतवाल गाउँपालिका–३ स्थित वातारा क्षेत्रबाट एक ट्रयाक्टरमा लुकाएर राखेको अवस्थामा लागूऔषध गाँजा बरामद गरेको छ ।
ट्रयाक्टरको ढालामुनि फल्स बटन बनाएर लुकाइएको अवस्थामा १५ वटा कार्टुनमा प्याक गरिएको करिब २२५ केजी गाँजा बरामद गरिएको बारा प्रहरीले जानकारी दिएको छ ।
प्रहरीका अनुसार पार्किङ गरी राखिएको ट्रयाक्टर ना.प्र. २–०३–००१ त ४८७६ बाट गाँजा बरामद भएको छ । प्रहरीले अनुसन्धानका क्रममा मकवानपुर हेटौंडा नगरपालिका–४ बस्ने २१ वर्षीय कमाण प्रजा, कैलाश गाउँपालिका–४ देवतिस बस्ने २४ वर्षीय सिताराम प्रजा र बकैया गाउँपालिका–५ छतिवन बस्ने २२ वर्षीय नवराज मगर पक्राउ गरेको प्रहरी निरीक्षक नायकले जानकारी दिए ।
ट्रयाक्टर चालक आदर्श कोतवाल गाउँपालिका–३ का अन्दाजी ३० वर्षीय नन्दकिशोर मुखिया बिनलाई नियन्त्रणमा लिएर सोधपुछ गरिँदा घटनामा अन्य व्यक्तिहरूको संलग्नता खुल्न आएको उनले बताए ।
पक्राउ परेका चारै जनालाई थप अनुसन्धान तथा कारबाही प्रक्रिया अघि बढाइएको जिल्ला प्रहरी कार्यालय बाराले जानकारी दिएको छ ।
