काठमाडौं, ०९ बैशाख । नेपाल शिक्षक महासंघले कक्षा १२ को परीक्षामा सामेल हुन शिक्षकहरुलाई धम्कीसहित दबाब आएको कुराप्रति ध्यानाकर्षण भएको जनाएको छ ।
राष्ट्रिय परीक्षा बोर्ड र जिल्ला प्रशासन कार्यालयका पदाधिकारीबाट धम्कीसहित परीक्षामा सामेल हुन दबाब आएको जनाएको छ । २१ दिनदेखि काठमाडौँमा आन्दोलन चलिरहेको समयमा सरकारले पेलेर परीक्षा सञ्चालन गर्छु भन्ने दम्भ देखाएको महासंघकी सहअध्यक्ष नानुमाया पराजुलीले बताएकी छन् ।
परीक्षा सञ्चालन गर्छु भन्ने र परीक्षा सामेल हुन दबाब दिन थालिएको छ। पेलेर परीक्षा परीक्षा सञ्चालन गरे उत्तरपुस्तिका परीक्षणमा पनि सहभागी नहुने निर्णय लिएका छौँ ।
बोर्डसँगको छलफलमा एक साता परीक्षा सार्न सकिने कुरा भएको थियो, माग पुरा गर्न छाडेर परीक्षा सञ्चालन गर्ने निर्णय गरियो। शिक्षकको मुद्दालाई वेवास्था गरियो त्यसको मूल्य सरकारले चुकाउनु पर्छ’, उनले भनिन् ।
बोर्डले कर्मचारी खटाएर पनि कक्षा १२ को परीक्षा सञ्चालन गर्ने निर्णय गरेपछि शिक्षक महासंघले बैठक बसी सडक आन्दोलनमा साथ दिन आग्रह समेत गरेको छ ।
विद्यालय, विद्यार्थी, शिक्षक र कर्मचारी मैत्री शिक्षा ऐन जारी गराउने महाअभियानलाई अघि बढाउन साथ र सहभागी हुन भनेको हो । संघले कक्षा १२ को परीक्षामा सामेल नहुन र केद्राध्यक्षहरुलाई आन्दोलनमा सहभागी हुन आग्रह गरेको छ ।
