जनकपुर, ३० चैत । राष्ट्रिय दलित पत्रकार संघ, नेपाल मधेस प्रदेशको प्रथम अधिवेशन जनकपुरमा सम्पन्न भएको छ ।
अधिवेशनबाट कैलास दासको अध्यक्षतामा १७ सदस्यीय नयाँ प्रदेश कार्यसमिति निर्विरोध चयन भएको छ । दलित समुदायका पत्रकारहरूको हक, हित र समानुपातिक समावेशीतालाई संस्थागत गर्न उद्देश्यले आयोजित उक्त अधिवेशनमा मधेस प्रदेश भरिबाट पत्रकारहरूको सहभागिता रहेको थियो ।
कार्यक्रमले संघको संगठनात्मक सुदृढीकरण, पत्रकारिता क्षेत्रभित्र दलित समुदायको पहिचान विस्तार, र सामाजिक न्याय प्रवद्र्धनका विषयमा गहिरो छलफल गरेको थियो ।
अध्यक्षमा कैलास दाससहित अन्य पदाधिकारीहरूमा उपाध्यक्ष, सचिव, कोषाध्यक्ष लगायत विभिन्न जिम्मेवारीमा रहेकाहरू पनि सहमतिबाट चयन भएका छन् ।
अधिवेशनमा दलित पत्रकारहरूको एकतामा जोड दिँदै लोकतान्त्रिक अभ्यासलाई सबल बनाउने र पत्रकारितामार्फत सामाजिक परिवर्तनको एजेण्डा अघि बढाउने प्रतिबद्धता व्यक्त गरिएको थियो ।
नव–निर्वाचित अध्यक्ष दासले कार्यकाल भर निष्पक्ष, समावेशी र उत्तरदायी पत्रकारिता प्रवद्र्धन गर्ने तथा संघलाई प्रदेशस्तरमै प्रभावकारी बनाउने योजना प्रस्तुत गर्नुभयो ।
कार्यसमिति सदस्यहरूलाई विभिन्न संघसंस्थाले बधाई ज्ञापन गर्दै सफल कार्यकालको शुभकामना व्यक्त गरेका छन् । अधिवेशनले दलित समुदायका आवाजलाई सशक्त बनाउँदै संघीय संरचनाभित्र पत्रकारहरूको भूमिकालाई अझ स्पष्ट बनाउने अपेक्षा रहेको राष्ट्रिय दलित पत्रकार संघ नेपालका अध्यक्ष बिनोद पहाडीले बताउनुभयो ।
