जनकपुरधाम, २२ चैत । मधेश प्रदेशमा योजना खरिद बिक्री भएको आरोप सम्बन्धमा छानविन हुने भएको छ ।
योजना खरिद बिक्रीबारे छानविन गर्न संसदीय छानविन समिति गठन गर्ने विषयमा सत्तारुढ दल सहमत भएको छ । सुशासनको नारा बोकेर सरकारको नेतृत्वमा जनमत पार्टी आएपनि चालु आर्थिक वर्षको योजना खरिद विक्री भएको आरोप लागेपछि प्रतिपक्षी नेकपा माओवादी केन्द्र र जसपा नेपालले सदन अवरुद्ध गरेको थियो ।
चैत १० मा बसेको प्रदेशसभा बैठकमा माओवादी र जसपा नेपालले योजना खरिद विक्री भएको भन्दै मुख्यमन्त्री र मन्त्रीहरुको आलोचना गर्दै सदन अवरुद्ध गरेको थियो भने आज प्रदेशसभा सचिवालयमा बसेको सर्वदलिय बैठकमा योजना खरिद विक्रीबारे छानविन गर्न सत्तारुढ दल तयार भएपछि सहमति जुटेको माओवादी साँसद युवराज भट्टराईले जानकारी दिए ।
चैत २६ मा प्रधानमन्त्रीले प्रदेशसभामा सम्बोधन गर्ने कार्यक्रम तय भएकाले त्यसका लागि सौहार्दपूर्ण वातावरण बनाउने, चैत २७ मा मुख्यमन्त्रीले जवाफ दिने र छानविन समिति बनाउने सहमति भएको हो ।
