जनकपुर, १४ चैत । मधेश प्रदेश सरकारले प्रथम आइजिपी कप क्रिकेट प्रतियोगितामा प्रथम स्थान प्राप्त गर्न सफल भएका मधेश प्रदेश प्रहरी कार्यालयका टिमलाई विहिवार जनकपुरमा एक कार्यक्रमका बीचमा सम्मान गरेको छ ।
मधेश प्रदेशका खेलकुद तथा समाज कल्याण मन्त्रालयको आयोजनामा मधेश भवनमा आयोजित सम्मान कार्यक्रममा प्रथम स्थान प्राप्त गर्ने प्रहरी खेलाडीहरूलाई मुख्यमन्त्री सतिश कुमार सिंहले सम्मानपत्र प्रदान गरेर सम्मान गरेका छन ।
सम्मान कार्यक्रममा बोल्दै मधेश प्रदेशका मुख्यमन्त्री सतिश कुमार सिंहले खेलाडीहरूको स्थायी वृत्ति विकासका लागि सरकारी रोजगारीसँग जोडेर कसरी सहयोग गर्न सकिन्छ भन्ने विषयमा प्रदेश सरकार गम्भीर रहेको बताए ।
उहाँले खेल तथा खेलाडीले देश तथा प्रदेशको सम्मान बढाउने काम गर्ने भएकाले खेलकुदको विकासका लागि प्रदेश सरकारले थोरै रुपमा भएपनि सहयोग गरेको र गर्ने पक्षमा रहेको समेत बताए ।
मधेश प्रदेशका खेलकुद तथा समाज कल्याणमन्त्री प्रमोद कुमार जयसवालले मधेश प्रदेशमा रहेका खेलाडीहरूको सम्मान बढाउनका लागि खेलाडीहरूको बिमा गर्ने र खेलको पूर्वाधार निर्माण तर्फ सरकारको विशेष ध्यान रहेको बताए ।
उनले ११ औँ राष्ट्रिय खेलकुद प्रतियोगिताको आयोजना गर्नका लागि खेलकुदको पूर्वाधारको निर्माण आवश्यक भएको बताउँदै दुई वर्ष भित्रमा नै अन्तर्राष्ट्रिय स्तरको रंगशाला निर्माण गर्ने शोचमा सरकार रहेको बताए ।
मधेश प्रदेश प्रहरी कार्यालयका प्रमुख प्रहरी नायव महानिरीक्षक लालमणि आचार्यले नेपालमा क्रिकेट खेलको राम्रो सम्भावना रहेकाले खेलाडीहरूको सेवा तथा सुविधा बढाउँदै लानु पर्ने धारणा राख्नुभयो ।
सम्मान कार्यक्रममा कार्यक्रममा मधेश प्रदेशका खेलकुद तथा समाज कल्याण मन्त्रालयका सचिव चुणामणि फुयाँल, मधेश प्रदेश प्रहरी टिमका प्रशिक्षक प्रशिक्षक प्रहरी निरीक्षक विक्रम साह तथा मधेश प्रदेश प्रहरी टिमका कप्तान कमलेश मण्डल धानुकले खेल र खेलाडीका विषयमा बोलेका थिए ।
