निभा झा । जनकपुर, २४ फागुन । आज अन्तर्राष्ट्रिय महिला दिवस विभिन्न स्थानमा विशेष कार्यक्रम र समारोहको आयोजना गर्दै मनाइएको छ ।
यसै अवसरमा जनकपुरस्थित मेनाष्टिक कलेजले आफ्नो क्याम्पसमा एक भव्य कार्यक्रम आयोजना गरेको छ । कलेजले महिला दिवसको महत्वलाई उजागर गर्दै विभिन्न कार्यक्रमहरू प्रस्तुत गरेको हो ।
कार्यक्रममा विशेषत महिला सशक्तिकरण र समाजमा महिलाको योगदानको कदर गर्दै कलेजले विभिन्न पेशागत क्षेत्रमा कार्यरत महिलाहरुलाई सम्मानित गर्यो । यसका साथै, जनकपुरका केही प्रमुख महिला पत्रकारहरुलाई पनि सम्मान प्रदान गरिएको छ ।
जसले आफ्नो पेशामा उत्कृष्टता हासिल गरेका छन् । कार्यक्रमका अवसरमा कलेजमा अध्ययनरत छात्रछात्राहरुले सांस्कृतिक प्रस्तुतिहरु पनि प्रस्तुत गरेका थिए ।
विशेषत महिलासम्बन्धी विषयवस्तुमा आधारित नृत्य र नाटक प्रस्तुत गरी कार्यक्रममा उपस्थित सबैलाई प्रभावित पारेका थिए । मेनाष्टिक कलेजका प्रमुख, शिक्षिका तथा छात्रछात्राहरुको उपस्थिति र सक्रिय सहभागिताले कार्यक्रमलाई अझ उत्साहजनक बनाएको थियो ।
कलेजका जिम्मेवार व्यक्तिहरुका अनुसार, यस प्रकारका कार्यक्रमहरूले महिला सशक्तिकरणमा सकारात्मक प्रभाव पार्ने आशा गरिएको छ ।
