काठमाडौं, १९ माघ । महिला त्रिकोणात्मक टी–२० आई सिरिजमा थाइल्याण्डले लगातार दोस्रो जित हात पारेको छ।
थाइल्याण्डले नेपाललाई ४ विकेटले हराएको छ । १ सय २ रनको प्रतिस्पर्धात्मक लक्ष्य थाइल्याण्डले १९ ओभरमा ६ विकेट गुमाएर पूरा गरेको हो । थाइल्याण्डका लागि नान्नापतले नट आउट रहँदै सर्वाधिक ६० रन जोडिन् ।
उनले ५८ बलमा ६ चौका प्रहार गरिन्।१६औं ओभरको चौथो बलमा नान्नापतले जीवनदान पाएकी थिइन् भने रुविना क्षेत्रीको बलमा कप्तान इन्दु बर्माले क्याच मिस गरेकी थिइन् ।
१७ औं ओभरको अन्तिम बलमा नेपालकी मनिषा उपाध्याय घाइते भएर मैदान छोडेकी थिइन् । नेपालका लागि मनिषा उपाध्यायले २ तथा कविता जोशी, कविता कुँवर र रुविना समान १ विकेट लिइन्। तेस्रो ओभरको अन्तिम बलमा बलिङका क्रममा कविता घाइते भएकी थिइन् ।
उनको ढाडमा समस्या आएपछि अस्पताल लगिएको थियो।त्यसअघि कीर्तिपुरस्थित टियु क्रिकेट मैदानमा टस जितेर पहिले ब्याटिङ गरेको नेपालले निर्धारित २० ओभरमा ९ विकेट गुमाएर १ सय १ रन बनायो।नेपालका लागि कविता र विन्दु रावलले सर्वाधिक रुपमा समान २५ रन बनाए। कविताले ३२ बलमा २ चौका प्रहार गरिन्।
बिन्दुले २५ बलमा ३ चौका प्रहार गरिन् भने कप्तान इन्दु बर्माले १७ बलमा २ चौकाको सहयोगमा १५ रन जोडिन् । ओपनर सम्झना खड्काले रनको खाता खोल्न नसक्दा ममता चौधरीले २ रन जोडिन् र पूजा महतो ६ तथा रुविना ४ रनमा आउट भइन्।
कविता जोशी ८ तथा सिता राना मगर २ रनमा आउट भइन्।जितसँगै २ खेलमा थाइल्याण्डको ४ अंक भएको छ। खेलेको दुवै खेलमा पराजित नेपाल अंकबिहीन छ । आफ्नो तेस्रो खेल नेपालले आइतबार नेदरल्याण्ड्ससँग खेल्नेछ ।
