रौतहट, १६ कातिक । रौतहटमा जंगली हात्तीको आक्रमणबाट एक महिलाको मृत्यु भएको छ ।
जिल्ला प्रहरी कार्यालय रौतहटले जानकारी दिए अनुसार शुक्रबार बिहान फतुवा बिजयपुर–११ रागी बुटुवा बस्ने ७० बर्षीया पातली माया तामाङलाई हात्तीले आक्रमण गर्दा मृत्यु भएको छ ।
आफ्नै घरमा सुतिरहेको अबस्थामा हात्तीको आक्रमणबाट पातली माया तामाङको मृत्यु भएको इलाका प्रहरी कार्यालय विजयपुरका प्रहरी निरीक्षक इन्द्रमणी अधिकारीले जानकारी दिनुभएको छ ।
जङ्गली हात्तीले बिहान एक्कसी आक्रमण गर्दा वृद्धाको मृत्यु भएको हो भने उनका श्रीमानले भागेर ज्यान जोगाएका छन् । हात्तीले पातलीमायाको घर पूर्णरुपमा क्षति गरेको छ ।
उनको घर सँगैको अर्को घरलाईसमेत क्षति पुर्याएको अधिकारीले बताए । घटना भएको जानकारी प्राप्त हुनासाथ जिल्लास्थित नेपाल प्रहरी, डिभिजन बन कार्यालय र सशस्त्र बेस क्याम्प बिजयपुरको प्रहरी टोली बुट्वा–राङी गाउँमा पुगेका थिए ।
