काठमाडौँ, २२ कार्तिक । तिहारको दोस्रो दिन आइतबार देशभर कुकुरतिहार र लक्ष्मीपूजा एकैदिन मनाइँदै छ। तिथिको घटबढका कारण बिहान चतुर्दशी र साँझ औँसी तिथि पर्ने भएकाले दुवै पर्व एकैदिन मनाउन लागिएको नेपाल पञ्चाङ्ग निर्णायक विकास समितिले जनाएको छ।
आज बिहान यमराजको दूत तथा भैरवको वाहनका रूपमा कुकुरको पूजा गरिन्छ। कुकुरलाई माला लगाएर मिठा परिकार खुवाउँदै उसको वफादारी र सुरक्षात्मक भूमिकाको सम्मान गर्ने धार्मिक परम्परा छ।
त्यस्तै, साँझ धनधान्य र समृद्धिकी देवी महालक्ष्मीको पूजा गरी घर, आँगन तथा मन्दिरमा दीप प्रज्वलन गरिन्छ। कात्तिक कृष्ण औँसीको रातलाई सुखरात्रिका रूपमा लिने धार्मिक मान्यता छ। घर सफा गरी दीपावली गर्दै लक्ष्मीको स्वागत गर्ने चलन रहेको छ।
पौराणिक मान्यताअनुसार समुद्र मन्थनका क्रममा औँसीकै दिन देवी लक्ष्मी प्रकट भएकाले यस दिन विशेष पूजाआजा र दीपावली गर्ने परम्परा सुरु भएको विश्वास गरिन्छ।
पञ्चाङ्ग समितिका अनुसार कात्तिक २३ गते गाईतिहार, २४ गते गोरुतिहार, गोवर्धन पूजा तथा म्हपूजा मनाइनेछ। सोही दिनदेखि नेपाल संवत् ११४७ प्रारम्भ हुनेछ। तिहारको अन्तिम दिन कात्तिक २५ गते भाइटीका परेको छ। यस वर्ष भाइटीकाको उत्तम साइत बिहान ११ बजेर ७ मिनेटमा रहेको समितिले जनाएको छ।
