जनकपुर, ८ भदौ । सर्लाहीमा मोटरसाइकल दुर्घटना हुँदा कविलासी नगरपालिका–४, हेमपुरका ४३ वर्षीय पूर्व वडाध्यक्ष अरविन्द कुमार यादवको निधन भएको छ ।
गएराति बरहथवा नगरपालिका–१०, सीतापुरस्थित किसनपुर चोकमा उनले चलाइरहेको मोटरसाइकल दुर्घटनामा परेको थियो ।
साँझ साढे ९ बजे टिकुलियाबाट बरहथवातर्फ जाँदै गर्दा प्रदेश २–०३–०२० प ३२४५ नम्बरको मोटरसाइकल दुर्घटनाग्रस्त भएको सर्लाही प्रहरीका प्रमुख एसपी रविन्द्रबहादुर सिंहले बताए ।
दुर्घटनामा गम्भीर घाइते यादवलाई उपचारका लागि प्राथमिक स्वास्थ्य केन्द्र बरहथवा पुर्याइए पनि चिकित्सकहरूले उनलाई मृत घोषणा गरेका थिए ।
मृतक यादवको शव हाल प्रदेशिक अस्पताल मलङ्गवामा राखिएको छ । यादव नेकपा एमाले जिल्ला कमिटीका सदस्य थिए र २०७९ को निर्वाचनमा वडाध्यक्षको प्रत्यासी थिए । घटनाको सम्बन्धमा अनुसन्धान भईरहेको प्रहरीले जनाएको छ ।
