जनकपुरधाम, २ बैशाख । मधेस प्रदेशका मुख्यमन्त्री सरोजकुमार यादवले चौथो पटक विश्वासको मत लिने तयारी गरेका छन् ।
सत्ता गठबन्धन फेरिएसँगै सरकारबाट नेपाली कांग्रेस बाहिरिएपछि मुख्यमन्त्री यादवले प्रदेशसभाबाट विश्वासको मत लिनुपर्ने भएको छ ।
वैशाख ४ गते बस्ने प्रदेश सभा बैठकमा मुख्यमन्त्री यादवले विश्वासको मत लिनेछन् । यसका लागि मुख्यमन्त्रीका तर्फबाट प्रदेश सभा सचिवालयमा पत्राचार गरिएको प्रदेश सभाका सभामुख रामचन्द्र मण्डले बताए ।
मुख्यमन्त्री यादवले १५ महिनामा चौथो पटक विश्वासको मत लिन लागेका हुन् । गत चैत ९ गते मधेस सरकारबाट कांग्रेस बाहिरिँदै सरकारप्रतिको समर्थन फिर्ता लिएको थियो ।
नयाँ समीकरण अनुसार मधेस प्रदेश सरकारमा जसपा, एमाले, माओवादी, एकीकृत समाजवादी पार्टी र लोसपा सहभागी छन् । लोसपा मन्त्रालय बाँडफाँटमा असन्तुष्ट छ ।
लोसपा प्रदेश सांसद रानी शर्माले भनिन्, ‘अहिलेको सरकारमा लोसपाको ठुलो असन्तुष्टि छ । हाम्रो पार्टी एकीकृत समाजवादीभन्दा ठुलो हो ।
तर हामीलाई एक मन्त्रालय दिइएको छ । अनि एकीकृत समाजवादीलाई केन्द्रीय समीकरण टिकाइ राख्न २ वटा मन्त्रालय दिने सहमति भएको छ । हामीलाई हाम्रो माग अनुसार मन्त्रालय दिइएन भने यथास्थितिमा सरकारमा रहिरहन कुनै जरुरी छैन ।
