नवलपरासी, २ चैत । एकल र नश्लवादी चिन्तत बोक्ने पार्टी र विचारबाट देश अगाडि बढ्न नसक्ने ‘राष्ट्रिय मुक्ति क्रान्ति अभियान’का संयोजक राजेन्द्र महतोले बताएका छन् ।
लोकतान्त्रिक समाजवादी पार्टी परित्याग गरेर नयाँ अभियान सुरु गरेका महतोले अहिलेका मधेशवादी दल र मूलधारका भनिएका पार्टीबाट मुलुकले विकास र समृद्धि हासिल नहुने बताएका हुन् ।
पश्चिम नवलपरासीको परासीमा पत्रकार सम्मेलन गर्दै महतोले अभियानमार्फत देशैभरि नयाँ शक्ति निर्माण गर्ने बताए । वर्षौंदेखि मधेशको समृद्धि र अधिकारका लागि लडाइँ लडेको भए पनि केही व्यक्ति र एकलवादी सोचको कारण मधेशको समस्या जस्ताको तस्तै रहेको दाबी गरेका छन ।
अबको आन्दोलन र अभियान उत्पीडन र अधिकारबाट वञ्चित भएकाहरूको अधिकार स्थापित गर्ने लडाइँको रुपमा अगाडि बढाउने महतोले बताए ।
अहिलेको अभियानले तराई, पहाड, हिमाल सबै क्षेत्रका समस्या र उत्पीडनलाई सम्बोधन गर्ने बताउँदै अभियानबाट जन्मने पार्टी बहुलवादी हुने बताए ।
