काठमाडौँ, ६ असोज । गृहमन्त्री सुधन गुरुङ र ऊर्जा, जलस्रोत तथा सिँचाइमन्त्री विराजभक्त श्रेष्ठले मौसम विज्ञान विभाग पुगेर असोज ९ देखि ११ गतेसम्म हुने भनिएको वर्षा तथा हिमपातबारे जानकारी लिएका छन्।
विभागका मौसमविद्का अनुसार बंगालको खाडीमा विकसित न्यूनचापीय प्रणालीका कारण देशका विभिन्न क्षेत्रमा भारीदेखि धेरै भारी वर्षा र उच्च हिमाली क्षेत्रमा हिमपातको सम्भावना छ। गण्डकी र लुम्बिनीमा वर्षाको प्रभाव बढी पर्ने तथा डुबान, कटान र पहिरोको जोखिम हुनसक्ने जनाइएको छ।
कोशी, मधेश, बागमती र गण्डकीमा वर्षाको गतिविधि बढ्ने तथा केही स्थानमा अति भारी वर्षासमेत हुनसक्ने विभागले जनाएको छ।
सम्भावित जोखिमलाई ध्यान दिँदै राष्ट्रिय विपद् जोखिम न्यूनीकरण तथा व्यवस्थापन प्राधिकरणले अत्यावश्यकबाहेक टाढा र रातिको समयमा यात्रा नगर्न आग्रह गरेको छ। जोखिमयुक्त सडकमा उद्धार तथा प्रतिकार्यका लागि आवश्यक उपकरण तयारी अवस्थामा राख्न सम्बन्धित निकायलाई भनिएको छ।
